Í dag þegar ég vaknaði eftir næturvaktina þá ætlaði ég að fara til mömmu. Klukkan var um 4 og sól og blíða réði ríkjum, bæði í borginni og í sinni mínu.
Ég klæddi mig í pils, grænan fleginn bol, hælaskó og málaði mig voða sætt.
Stökk út en sá um leið og ég kom að blílnum að það var sprungið á honum, ja eiginlega ekki sprungið, því það sprakk um daginn en ég lagaði það með "viðgerðarfroðu" sem fyrrverand kærastinn benti mér á að væri til... svo var ég búin að vera að slugsast við að fara með dekkið á verkstæði... algjörlega sjálfri mér að kenna.
Eftir að hafa staðið og blótað í svona 5 mínútur sá ég að það myndi engu skila :-D
Ég yrði sennilega að skipta um dekkið. Bölv mitt og ragn myndu ekki verða til þess að það hætti að vera sprungið, híhíhí...
Nú jæja... íklædd hælaskóm og pilsi hófst ég handa við að tjakka Lassa upp. Það var drulluerfitt en hafðist þó að lokum. Þá var að finna apparatið felgujárn til að skrúfa þetta drasl í sundur. Skottið hjá mér lítur út svipað og bíllinn sjálfur... fullt af drasli :-( þannig að ég var heillengi að finna felgujárnið og sá þá einnig, mér til mikillar skelfingar, að það var ekkert varadekk! Meira bölv.
Þar sem ég stóð og sýtti örlög mín og bílsins, ljómaði upp í huga mér minningin um það þegar ég var að flytja í vesturbæinn... Dekk!
Útigeymslan hjá mér er full af dekkjum!
Ég stökk hæð mína (erfitt á hælum) og hljóp inn til að athuga með þessi dekk. Eins og reglan vill hafa það þá voru þau vitaskuld innst í geymslunni og ég þufti að rífa út gamla eldhúsborðið og helling af dótaríi til að nálgast þau.
Mikil var mæða mín þegar fyrstu 3 dekkin voru felgulaus...
En 4 dekkið var á felgu! Ég las á það til að tékka á stærðinni... en nei, það var of stórt....
175 r eitthvað 13 bla bla... en undir bílnum eru 155 r 13 eitthvað.
Brast næstum í grát.
Dekk 5 var líka á felgu og hét 155.... Húrra!
Ég burðaðist með það upp stigann og að bílnum.
Nú tóku við 30 mínútur þar sem ég andskotaðist á rónum á felgunni til að ná sprungna dekkinu af.
Ég væri í alvöru til í að eiga þetta á vídeó!
Ég stóð upp á felgujárninu og hoppaði á því til að losa um rærnar en ekkert gekk.
Ég er nú engin léttavara, en þær högguðust ekki!
Til allrar hamingju er ég yfirleitt frekar bjartsýn og jákvæð, því á þessum tímapunkti hefði ég skotið bílinn minn hefði ég átt byssu!
Önnur hugljómun! WD40! Það er eitthvað voða sniðugt sagði heilinn og ég fór aftur að róta í skottinu til að gá hvort ég ætti þannig.
Jújú.. haldiði að ég eigi ekki bara fullann brúsa :-D
Sprautaði WD40 á rærnar og beið í smá stund, velti því fyrir mér hvort ég ætti að fara og skipta um föt en ákvað að það tæki því nú varla, var orðin rennsveitt :-þ
Eftir meira felgujárns-hopp (á hælaskóm muniði) gat ég loksins losað allar rærnar af, þvílíka hamingjutilfinningu hef ég sjaldan upplifað! Ég gat þetta... alveg sjálf!
Reif dekkið af og skellti hinu undir.
Eða reyndi að skella því undir.
Götin á þessari felgu og skrúfgangspinnarnir í hjólamekanismanum pössuðu ekki saman!
Það var of lítið bil á milli gatana...
Ég stóð, gjörsamlega agndofa, á götunni og langaði helst til að henda mér á húddið og öskra.
En ég gat hamið mig, mjög ódömulegt að öskra út á miðri götu svona á sunnudegi :-D
(eins og það er nú óstjórnlega dömulegt að vera bullsveitt, með ryk og smurningu upp á olnboga og sennilega í framan líka að bisa við að skipta um dekk)Aftur í geymsluna.
Dekk 6 var ekki á felgu en dekk 7 var það og það var passlega stórt. Nú var að sjá hvort það passaði undir hann Lassa minn.
Endurtók sama leikinn og bar dekkið við hjólabúnaðinn.
ÞAÐ PASSAR!
Æpti ég upp yfir mig þegar ég kom dekkinu á :-D
Mikið magn smáfugla fengu taugaáfall og flugu burt úr vesturbænum og Loka brá svo mikið að hann stökk af þaki bílsins, þar sem hann hafði í mestu makindum horft á matmóður sína erfiða, og upp í tré.
Jæja. Eftirleikurinn var auðveldur. Skrúfa rærnar aftur á, tjakka bílinn niður, skella ónýta dekkinu í skottið og fara svo og skipta um föt.
Og fara aftur í sturtu. Nei nei... ég sleppti því reyndar... en vá hvað ég var sveitt og skítug :-þ
Þetta kennir mér að ég get allt sem ég vil og að ég er hetja!
