Kötturinn Jesper er týndur
Við eigum yndislegan kött sem við köllum Jesper Jeppesen... en hann gengur alla jafna undir nafninu Jesper þó svo einstaka sinnum sé hann kallaður Speri sprettur.
Á laugardaginn fórum við með hann til vina okkar í pössun þar sem við hjónin fórum í smá afslöppunarferð. Á sunnudeginum berast okkur þau tíðindi að Jesper hafi á einhvern óskiljanlegan hátt smyglað sér út um nánast lokaðan glugga... á Hagamel... í Reykjavík... og við búum í Hafnarfirði.
Jesper er hvítur með dökkum blettum á baki og höfði og með dökkt skott.
Jesper er hvers manns hugljúfi og afskaplega kelinn gaur. Hann er hins vegar líka rosalega hrekkjóttur. Hann á það til að snúa við og fara í hina áttina þegar maður kallar til hans, bara til að skaprauna manni.
Myndband frá því í janúar af kauða
http://www.facebook.com/v/74273627204
Jesper gæti verið á ferli á svæðinu í kringum Melabúðina og Vesturbæjarlaugina. Ef ég þekki sælkerann Jesper rétt þá er ekki loku fyrir það skotið að hann sé búinn að finna sér samastað í ísbúðinni á Hagamel...
Nú biðjum við þig lesandi góður að líta eftir honum ef þú átt leið um vesturbæinn eða að áframsenda þetta á alla sem þú þekkir í Vesturbænum. Uppáhaldsfelustaðirnir hans Jespers eru í þvottahúsum, undir veröndum og í skotum sem hafa að geyma einhvern hita.
Allar ábendingar eru vel þegnar hér í kommentakerfinu.
