Fiskibollur Rögga

• 1500 gr fiskur (þorskur er bestur)
• 1 meðalstór laukur
• 1-2 egg
• 3-5 dl mjólk
• 3 kúfaðar msk hveiti
• 3 kúfaðar msk kartöflumjöl
• Salt og hvítur pipar (ég set hálfa msk af hvoru, en best er að gera þetta eftir smekk)

Góð tilbreyting við fiskibollurnar er að bæta 2-3 bollum af hökkuðum osti í 1500 gr. af fiski.
Ostabollurnar eru sjúklega góðar.

Ef fiskurinn er frosinn skal halda vökvanum sem rennur af til hliðar og nota hann með mjólkinni síðar í uppskriftinni.
Fiskur og laukur er hakkað saman (gott er að skera laukinn í nokkra geira og láta með fiskinum í hakkavélina).
Eggin eru sett í hakkið (eitt egg ef það er stórt, annars tvö) og hrært mjög vel saman á hægum snúningi.
3-5 dl mjólk (og fiskisafa) blandað við hægt og rólega. Salt og pipar sett út í.
Hakkið á að vera þykkur massi eftir að kryddinu er bætt út í, því þarf að fara varlega í mjólkina.
Hveitinu og kartöflumjölinu bætt saman við og hrært rosalega vel.
Með matskeið eru myndaðar bollur og steiktar mjög vel, kældar og frystar.
Úr þessari uppskrift fást ca. 120 bollur.